Die 14 februarii

Ss. Cyrilli, monachi, et Methodii, episcopi

Memoria

Ant. ad introitum

Isti sunt viri sancti facti amíci Dei,

divínæ veritátis præcónio gloriósi.

Collecta

Deus, qui per beátos fratres Cyríllum et Methódium

Slavóniæ gentes illuminásti,

da córdibus nostris tuæ doctrínæ verba percípere,

nosque pérfice pópulum

in vera fide et recta confessióne concórdem.

Per Dóminum.

Super oblata

Réspice, Dómine, múnera

quæ in commemoratióne beatórum Cyrílli et Methódii

maiestáti tuæ deférimus, et præsta,

ut signum fiant humanitátis novæ

in dilectióne caritátis tibi reconciliátæ.

Per Christum.

Ant. ad communionem Cf. Mc 16, 20

Profécti sunt discípuli Evangélium prædicántes,

Dómino cooperánte et sermónem confirmánte,

sequéntibus signis.

Post communionem

Deus, cunctárum Pater géntium,

qui nos de uno pane et uno Spíritu

partícipes éfficis ac ætérni herédes convívii,

in hac festivitáte beatórum Cyrílli et Methódii

benígnus concéde,

ut tuórum multitúdo filiórum,

in eádem fide persevérans,

unánimis regnum iustítiæ et pacis ædíficet.

Per Christum.